Caadiyan; iibka ay diinta Islaamku ogoshahay waa sidan:

• In laba qof ay kala doorsadaan laba shay, iyada oo labada qof mid waliba xoriyad u haysto inuu iibsado ama doorsado, iyo inuu diidi karo ba, isla markaa na raali ku yahay dhinac kasta waxa uu iibsanayo ama doorsanayo, kadibna qof kasta wixii uu iibsaday mulkigiisu uu si rasmi ah ugu soo wareegayo.

Hadaba maanta waxyaabaha la kala iibsado, waxa ka mid ah Data-da Internet-ka, taasi oo dadkeenu ay aad u iibsadaan, laakiin aan badanka loo eegin saxnaanshiiyaha iibkaasi.

Anigu waxaan ku arkay iibkaasi khalad weyn oo ku jira, bal u fiirso tusaalahan si aan kuu fahamsiiyo khaladkaasi.

TUSAALE:-
Waxaad iibsatay Internet Data nooceedu yahay $5, oo u dhiganta 25GB, oo ku xadidan bil gudaheed inaad ku isticmaasho.

KHALADKA KU JIRA IIBKANI:-
Marka qofku bixiyo lacagta $5 ah, waa in shuruud la’aan uu qofkaasi ku helo 25GB oo Data ah, oo account/numberkiisa ugu soo dhaca, laakiin iibkaasi sida ka muuqata, mulkigii waxa ku qaydan shuruud ah isticmaalka bil gudaheed, markaa xoriyaddii mulkiga ama lahaanshiiyuhu ma dhameystirna, waxa taasi ka sii daran, oo anigu aan dulmi weyn u arkaa, in bishaasi markay dhamaato, hadii qofkii ay weli wax uga hadhsan yihiin 25GB, in wixii uga hadhsanaa ay shirkadu ka masaxdo account/numberkii qofka…

• Eeg; Internet Data-daasi qofku uu iibsaday wixii uga hadhsanaa, waa in shirkadu qiimaha lacageed ee ay intaasi noqonayso qofkii u soo celiso, ama waa in ay qofkii ugu jirto account-kiisa, ilayn bilaash kumay siinine already lacagteedii $5 ahyd qofkii way ka sii qadimteene.

TUSAALE:

Waxaad iibsatay Internet Data nooceedu yahay, in habeen kasta ay kuu soo dhacdo Data xadigeedu yahay 2GB, oo aad ku isticmaalayso 24-saacadood gudahood.

Eeg; noocanna hadii qofka iyada oo 1GB weli u hadhsan tahay, ay gaadho 12:00 habeenimo, shirkadu hadhaagii 1GB ahaa way la noqonaysaa ama way ka masaxaysaa account-kii qofka, waxa qofkii loo soo daynayaa uun 2GB ee maalinka ku xigta uu xaqqa ugu lahaa, kolkaa qofkii waxa ka maqan 1GB oo aanu Data ahaanna ku haynin, lacagtii uu ku iibsadayna aanay usoo noqonaynin, miyaanay markaa dulmi cad ahayn arrintaasi.

Anigu markaan dhinac walba ka eegay, waxaan dhaafin waayay in shirkaddu aanay qofka kala noqonin wixii Data-da uu ka iibsaday uga hadhsan, laakiin marka muddadii ay ku xadidnayd isticmaalkeedu gaadho, ay freeze-gareeyaan ama xanibaan inta uu qofku iibsanayo Data cusub, kadibna hadhaagii Data-diisii hore iyo Data-da cusub oo isku biiray ay active qofkii u noqdaan, inkasta oo freeze-gareyntaasi ay weli Islaam ahaan caqabad ku tahay saxnaanshiiyaha iibkaa aan mulkigii si dhameystiran ugu wareegaynin Iibsadihii.

Hadii se maskaxda aad loo baadho, waa la heli karaa qaab uu iibkaasi Internet Data-du ku saxmo shuruudihiisu.

FG:

• Bal ka waran dadka ka faraqabsaday iibkaa dulmiga cad uu ku jiro, ee daaraha ka dhistay, ee tobaneeyo sanno cunayay, carruurahooda na cunsiiyay kuna biiliya.
• Lacagta laga shaqaystay iibkaa dulmiga cad uu ku jiro, miyaa laga soo xajji karaa? Masaajid miyaa lagu dhisi karaa?
• Maxaa se loo waayay, cid ka hadasha dulmigaa bulshada ku socday muddada badan, ee dhaqaalihii wadhatada iyo maxasta lagu urursaday?

Jookarrada mimbarrada iyo fagaarayaasha diinta, ayaaba shirkadaha Isgaadhsiintu u xidhan yihiine, yaa kale ka hadli dulmigaasi.

Abwaan Gaariye wuxuu yidhi:

• Nin dawee la leeyahay,
• Dembi uu badh leeyahay,
• Xalka doon la leeyahay,
• Isagu u daran yahay’oo
• Inuu daaro ma ogola,
• Daaraanta mililka leh,
• Anna deyso ma ogolo,
• Deebaaqda igu mudan,

Mar kale Abwaanku wuxuu yidhi:

• Qar hadduu ku soo dumo,
• Wallee ciidda kama qodo,
• Wallee qalin-daraalaha,
• Dambi qaranka laga galay,
• Kama qariyo wadhatada,
• Wallee qoonta mililka leh,
• Qaarka sare ma dhaydhayo,

Markii ay jookarada saaxada diintu yidhaahdeen waa RIBBO, lacagta dulsaarka(INTEREST) loo yaqaano, ee ay maanta adduunayadu adeegsato, taasi oo khasaare-kab u ah, lacagta la deynsadaa muddada ay qofka leh ka maqan tahay, isbadalka ku yimaadaa qiimaheeda iyo awoodii goynta ee ay lahayd is-dhinka ku yimaada, maadaama oo waraaqaha lacagta loo yaqaannaa, aanay cayntooda ama iskood qiime u lahayn, laakiin ay yihiin wax qiimahoodu ku sar go’an yahay, kolba waxa lagu badalanayaa qiimaha uu suuqa ka leeyahay iyo baahida loo qabaa inta ay leeg tahay.

Kadibna ay jookaradaasi badiil uga dhigeen muslimiinta, waxyaabo layaab iyo amakaag noqonaya diiniyan, oo aan ka xusi karo:
MURAABAXO: waxay yidhaahdeen qofka rabba inuu lacag deynsado, waa inuu Bangiga deynta uu ka rabbo u tago, kadibna u sheego waxa uu lacagta deynta ah ku qabsanayo, why? Maxaan ugu sheegayaa? Miyaanay taasi xoriyad-la’aan qofkii dhigeyn, marka uu qofkii u sheego Bangiga wixii uu rabbay, ayaa bangigii soo iibsanayaa wixii, kadibna qofkii ayuu kaga sii iibinayaa qiimihii suuqa mid ka sareeya, qofkiina wuu khasban yahay oo waxa laga faa’iideysanayaa baahidiisii.

Waxa la sheegaa in badanka Lacagta dulsaarka ee jookaradu ay ku sheegeen ribaddu, aanay badanka dhaafin 7%, laakiin iibka muraabaxadu waxa la sheegaa inuu yahay amaba gaadho 24%, miyaan wadhatada loo tashan, oo aanay jookarada saaxada diintu qorshaysanin inay noqdaan kaligood-noolayaal.